|
[1] ܘܫܲܕܲܪ ܚܝܼܪܵܡ ܡܲܠܟܵܐ ܕܨܘܿܪ ܐܝܼܙ̈ܓܲܕܹ̇ܐ ܠܘܵܬ̣ ܕܵܘܝܼܕ݂. ܘܫܲܕܲܪ ܠܹܗ ܩܲܝܣܹ̈ܐ ܕܐܲܪܙܵܐ: ܘܐܲܪ̈ܕܸ̇ܟ݂ܠܹܐ ܕܒܸܢܝܵܢܵܐ: ܘܢܲܓܵܪܹ̈ܐ ܕܩܲܝܣܹ̈ܐ: ܠܡܸܒ̣ܢܵܐ ܠܹܗ ܒܲܝܬܵܐ.
[2] ܗܵܝܕܹ̇ܝܢ ܝܼܕܲܥ ܗ̄ܘ̣ܵܐ ܕܵܘܝܼܕ݂ ܕܲܓ̣ܒ̣ܵܝܗܝ ܡܵܪܝܵܐ ܕܢܸܗܘܹܐ ܡܲܠܟܵܐ ܥܲܠ ܝܼܣܪܵܝܹܠ. ܘܐܸܬ̇ܬ̇ܪܝܼܡܲܬ̣ ܡܲܠܟ̇ܘܼܬܹܗ ܠܥܸܠ:ܕܢܸܗܘܹܐ ܡܲܠܟܵܐ ܥܲܠ ܥܲܡܹܗ ܝܼܣܪܵܝܹܠ.
[3] ܘܲܢܣܲܒ̣ ܕܵܘܝܼܕ݂ ܢܸܫܹ̈ܐ ܡ̣ܢ ܐܘܿܪܸܫܠܸܡ: ܡ̣ܢ ܒܵܬܲܪ ܕܐܸܬ̣ܵܐ ܡ̣ܢ ܚܸܒ̣ܪܘܿܢ: ܘܐܸܬ̣̱ܝܼܠܸܕ݂ ܠܹܗ ܒ̈ܢܲܝܵܐ ܘܲܒ̣̈ܢܵܬ̣ܵܐ.
[4] ܘܗܵܠܹܝܢ ܫܡܵܗܹ̈ܐ ܕܲܒ̣̈ܢܲܝܵܐ ܕܐܸܬ̣̱ܝܼܠܸܕ݂ܘ ܠܹܗ ܒܐܘܿܪܸܫܠܸܡ: ܫܵܡܘܿܥ: ܘܫܵܟ݂ܘܿܒ̣: ܘܢܵܬ̣ܵܢ: ܘܲܫܠܹܝܡܘܿܢ.
[5] ܘܝܲܒ̣ܚܵܪ: ܘܐܹܠܝܼܫܲܥ: ܘܐܹܠܝܼܦܠܲܛ.
[6] ܘܢܝܼܚ: ܘܲܢܦܵܓ̣: ܘܲܢܦܝܼܠ.
[7] ܘܐܹܠܝܼܫܡܲܥ: ܘܐܹܠܝܼܕܲܥ: ܘܐܹܠܝܼܦܠܲܛ.
[8] ܘܲܫܡܲܥܘ ܦܠܸܫܬܵܝܹ̈ܐ ܕܐܸܬ̣ܡ̱ܫܲܚ ܕܵܘܝܼܕ݂ ܕܢܲܡܠܸܟ݂ ܥܲܠ ܟܠܹܗ ܝܼܣܪܵܝܹܠ ܘܲܣܠܸܩܘ ܗ̄ܘ̣ܵܘ ܟܠܗܘܿܢ ܦܠܸܫܬܵܝܹ̈ܐ: ܕܢܸܒ̣ܥܘܿܢ ܠܕ݂ܵܘܝܼܕ݂ ܘܫܡܲܥ ܕܵܘܝܼܕ݂: ܘܲܢܦܲܩ ܠܐܘܼܪ̱ܥܗܘܿܢ.
[9] ܘܲܦܠܸܫܬܵܝܹ̈ܐ ܐܸܬ̣ܵܘ: ܘܲܫܪܵܘ ܒܥܘܼܡܩܵܐ ܕܓܲܢ̄ܒܵܪܹ̈ܐ.
[10] ܘܲܫܐܸܠ ܕܵܘܝܼܕ݂ ܒܡܵܪܝܵܐ: ܘܐܸܡܲܪ: ܐܸܣܲܩ ܥܲܠ ܦܠܸܫܬܵܝܹ̈ܐ: ܘܬܸܬܸ̇ܠ ܐܸܢܘܿܢ ܒܐܝܼ̈ܕܲܝ. ܘܐܸܡܲܪ ܠܹܗ ܣܲܩ: ܘܐܸܬܸ̇ܠ ܐܸܢܘܿܢ ܒܐܝܼܕܲܝ̈ܟ.
[11] ܘܲܣܠܸܩ ܠܲܦܩܲܥܬ̣ܵܐ ܕܬ̣ܘܼܪ̱ܥܬ̣ܵܐ. ܘܲܚܪܲܒ̣ ܐܸܢܘܿܢ ܬܲܡܵܢ ܕܵܘܝܼܕ݂. ܘܐܸܡܲܪ: ܬܪܲܥ̣ ܡܵܪܝܵܐ ܠܲܒ̣ܥܸܠܕ̇ܒ̣ܵܒܲܝ̈ ܩܕ݂ܵܡܲܝ: ܐܲܝܟ݂ ܬܘܼܪ̱ܥܬ̣ܵܐ ܕܡܲـ̈ـܝܵܐ ܡܸܛܠ ܗܵܢܵܐ ܩܪܵܐ ܫܡܵܗ̇ ܕܕ݂ܘܼܟ̇ܬ̣ܵܐ ܗܵܝ̇ ܦܩܲܥܬ̣ܵܐ ܕܬ̣ܘܼܪ̱ܥܬ̣ܵܐ.
[12] ܘܲܫܒܲܩܘ ܬܲܡܵܢ ܦܬܲܟ݂ܪ̈ܲܝܗܘܿܢ. ܘܐܸܡܲܪ ܕܵܘܝܼܕ݂ ܠܓܲܢ̄ܒܵܪ̈ܵܘܗܝ: ܐܵܘܩܸܕ݂ܘ ܐܸܢܘܿܢ ܒܢܘܼܪܵܐ: ܘܲܕ݂ܪܵܘ: ܥܲܦ̱ܪܗܘܿܢ: ܒܪܘܼܚܵܐ.
[13] ܘܐܵܘܣܸܦܘ ܬܘܼܒ̣ ܦܠܸܫܬܵܝܹ̈ܐ ܠܡܸܣܲܩ: ܘܲܫܪܵܘ ܗ̄ܘ̣ܵܘ ܒܲܦܩܲܥܬ̣ܵܐ ܕܓܲܢ̄ܒܵܪܹ̈ܐ.
[14] ܘܲܫܐܸܠ̣ ܬܘܼܒ̣ ܕܵܘܝܼܕ݂ ܒܡܵܪܝܵܐ. ܘܐܸܡܲܪ ܠܹܗ:ܠܵܐ ܬܸܣܲܩ: ܐܸܬ̣ܗܲܦܟ݂ ܠܵܟ݂ ܡܸܢܗܘܿܢ: ܘܙܸܠ ܩܲܒܸ̇ܠ ܐܸܢܘܿܢ ܡ̣ܢ ܩܕ݂ܵܡܲܝܗܘܿܢ.
[15] ܘܟܲܕ݂ ܬܸܫܡܲܥ ܩܵܠܵܐ ܕܝܑܼܠܲܠܬܵܐ ܒܪܹܫܹܗ ܕܛܘܼܪܵܐ: ܗܵܝܕܹ̇ܝܢ ܬܸܦܘܿܩ ܠܩܹܐܪܣܵܐ ܡܸܛܠ ܕܗܵܝܕܹ̇ܝܢ ܗ̄ܘ̣ ܢܵܦܹܩ ܡܵܪܝܵܐ ܩܕ݂ܵܡܲܝܟ: ܠܡܸܚܪܲܒ̣ ܠܡܲܫܪܝܼܬ̣ܵܐ ܕܲܦܠܸܫܬܵܝܹ̈ܐ.
[16] ܘܲܥܒܲܕ݂ ܕܵܘܝܼܕ݂ ܗܵܟܲܢܵܐ: ܐܲܝܟܲܢܵܐ ܕܦܲܩܕܹܗ ܡܵܪܝܵܐ. ܘܲܚܪܲܒ̣ ܠܡܲܫܪܝܼܬ̣ܵܐ ܕܲܦܠܸܫܬܵܝܹ̈ܐ ܡ̣ܢ ܓܸܒ̣ܥܘܿܢ ܘܲܥܕܲܡܵܐ ܠܓܵܕ݂ܵܪ.
[17] ܘܲܢܦܲܩ ܗ̄ܘ̣ܵܐ ܕܵܘܝܼܕ݂ ܠܟ݂ܠܗܹܝܢ ܡܕ݂ܝܼ̈ܢܵܬ̣ܵܐ. ܘܡܵܪܝܵܐ ܝܲܗ̄ܒ̣ ܕܸܚ̱ܠܬܹܗ ܥܲܠ ܟܠܗܘܿܢ ܥܲܡܡܹ̈ܐ.
|