|
[1] ܘܲܗܘ̤ܵܐ ܥܠܲܝ ܦܸܬ̣ܓ̣ܵܡܹܗ ܕܡܵܪܝܵܐ ܠܡܹܐܡܲܪ.
[2] ܒܲܪܢܵܫܵܐ: ܐܸܬ̣ܢܲܒܵܐ ܥܲܠ ܪ̈ܵܥܘܵܬ̣ܵܐ ܕܝܼܣܪܵܝܹܠ: ܐܸܬ̣ܢܲܒܵܐ ܘܐܸܡܲܪ ܠܗܘܿܢ: ܪ̈ܵܥܵܘܵܬ̣ܵܐ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܐܘܿ ܪ̈ܵܥܵܘܵܬ̣ܵܐ ܕܝܼܣܪܵܝܹܠ ܕܪܵܥܹ̇ܝܢ ܠܗܘܿܢ: ܠܵܐ ܗ̄ܘܼܵܐ ܠܥܵـ̈ـܢܵܐ ܪܵܥܹ̇ܝܢ ܪ̈ܵܥܵܘܵܬ̣ܵܐ.
[3] ܫܲܡܝܼܢܹ̈ܐ ܐܵܟ̣ܠܝܼܢ ܐ̄ܢܬ̇ܘܿܢ: ܘܥܲܡ̱ܪܗܘܿܢ ܠܵܒ̣ܫܝܼܢ ܐ̄ܢܬ̇ܘܿܢ: ܘܡܦܲܛܡܹ̈ܐ ܕܵܒ̣ܚܝܼܢ ܐ̄ܢܬ̇ܘܿܢ: ܘܥܵܢܵܐ ܠܵܐ ܪܵܥܹ̇ܝܢ ܐ̄ܢܬ̇ܘܿܢ.
[4] ܠܕܲܟ̣ܪܝܼܗܵܐ ܠܵܐ ܚܲܝܸܠܬ̇ܘܿܢ: ܘܲܕܼܡܲܪܥܵܐ ܠܵܐ ܐܲܣܝܼܬ̇ܘܿܢ: ܘܕܲܬ̣ܒ̣ܝܼܪܵܐ ܠܵܐ ܥܨܲܒ̣ܬ̇ܘܿܢ: ܘܲܕܼܛܵܥܝܵܐ ܠܵܐ ܐܲܗܦܸܟ̣ܬ̇ܘܿܢ: ܘܕܲܐܒ̇ܝܼܕܼܵܐ ܠܵܐ ܒܥܲܝܬ̇ܘܿܢ: ܐܸܠܵܐ ܒܲܩܛܝܼܪܵܐ ܫܲܥܒܸ̇ܕ̇ܬ̇ܘܿܢ ܐܸܢܹܝܢ.
[5] ܘܐܸܬ̣ܒܲܕ̇ܪܲܬ̤ ܥܵܢ̈ܝ ܡ̣ܢ ܒܠܲܝ ܪܵܥܝܵܐ: ܘܲܗ̤ܘܲܝ̈ ܡܹܐܟ̣ܘܼܠܬܵܐ ܠܟ̣ܠܵܗ̇ ܚܲܝ̄ܘܼܬ̣ܵܐ ܕܕܲܒ̣ܪܵܐ.
[6] ܘܲܛܥܵܬ̤ ܥܵܢܝ̈ ܒܟ̣ܠܗܘܿܢ ܛܘܼܪܹ̈ܐ: ܘܥܲܠ ܟܠ ܪܵܡܬ̣ܵܐ ܕܪܵܡܵܐ: ܘܲܒ̣ܟ̣ܠܵܗ̇ ܐܲܪܥܵܐ ܐܸܬ̣ܒܲܕ̇ܪܲܬ̤ ܥܵܢ̈ܝ: ܘܠܲܝܬ̇ ܕܬ̣ܵܒܲܥ ܐܵܦܠܵܐ ܕܲܡܟܲܢܸܫ.
[7] ܡܸܛܠ ܗܵܢܵܐ ܫܡܲܥܘ ܪ̈ܵܥܵܘܵܬ̣ܵܐ ܦܸܬ̣ܓ̣ܵܡܹܗ ܕܡܵܪܝܵܐ.
[8] ܚܲܝ ܐ̄ܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܥܲܠ ܕܲܗܘ̤ܵܬ̣ ܥܵܢ̈ܝ ܠܒܸܙܬ̣ܵܐ: ܘܲܗܘ̤ܵܬ̣ ܥܵܢ̈ܝ ܡܹܐܟ̣ܘܼܠܬܵܐ ܠܟ̣ܠܵܗ̇ ܚܲܝ̄ܘܼܬ̣ܵܐ ܕܕܲܒ̣ܪܵܐ ܡ̣ܢ ܒܠܲܝ ܪܵܥܝܵܐ: ܘܠܵܐ ܪܥܵܘ ܪ̈ܵܥܵܘܵܬ̣ܵܐ ܠܥܵܢ̈ܝ: ܐܸܠܵܐ ܪܥܵܘ ܪ̈ܵܥܵܘܵܬ̣ܵܐ ܠܢܲܦ̮ܫܗܘܿܢ: ܘܲܠܥܵܢ̈ܝ ܠܵܐ ܪܥܵܘ.
[9] ܡܸܛܠ ܗܵܢܵܐ ܪ̈ܵܥܵܘܵܬ̣ܵܐ: ܫܡܲܥܘ ܦܸܬ̣ܓ̣ܵܡܹܗ ܕܡܵܪܝܵܐ.
[10] ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܐܸܢܵܐ ܥܲܠ ܪ̈ܵܥܵܘܵܬ̣ܵܐ: ܘܐܸܬ̣ܒܲܥ ܥܵܢ̈ܝ ܒܐܝܼܕܲܝ̈ܗܘܿܢ: ܘܐܹܒܲܛܸܠ ܐܸܢܘܿܢ ܕܠܵܐ ܢܸܪܥܘܿܢ ܬܘܼܒ̣ ܠܥܵܢ̈ܝ: ܘܐܹܦܲܨܹܐ ܠܥܵܢ̈ܝ ܡ̣ܢ ܦܘܼܡܗܘܿܢ: ܘܬ̣ܘܼܒ̣ ܠܵܐ ܢܸܗܘ̈ܝܵܢ ܠܗܘܿܢ ܠܡܹܐܟ̣ܘܼܠܬܵܐ.
[11] ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܬܵܒܲܥ ܐ̄ܢܵܐ ܠܥܵܢ̈ܝ: ܘܣܵܥܲܪ ܐ̄ܢܵܐ ܠܗܹܝܢ.
[12] ܐܲܝܟ ܕܣܵܥܲܪ ܪܵܥܝܵܐ ܠܲܓ̣ܙܵܪܹܗ ܒܝܵܘܡܵܐ ܕܙܝܼܩܵܐ: ܗܵܟܲܢܵܐ ܐܸܣ̱ܥܪܝܼܗ̇ ܠܥܵܢ̈ܝ: ܘܐܹܟܲܢܸܫ ܐܸܢܹܝܢ ܡ̣ܢ ܟܠ ܐܲܬ̣ܪ̈ܵܘܵܬ̣ܵܐ ܕܐܸܬ̣ܒܲܕܲܪ ܒܗܘܿܢ: ܒܝܵܘܡܵܐ ܕܲܥܢܵܢܵܐ ܘܲܕܼܥܲܪܦܸܠܵܐ.
[13] ܘܐܲܦܸܩ ܐܸܢܹܝܢ ܡ̣ܢ ܥܲܡܡܹ̈ܐ: ܘܐܹܟܲܢܸܫ ܐܸܢܹܝܢ ܡ̣ܢ ܡܕܼܝܼ̈ܢܵܬ̣ܵܐ: ܘܐܲܝܬܹ̇ܐ ܐܸܢܹܝܢ ܠܐܲܪ̱ܥܗܹܝܢ: ܘܐܸܪܥܸܐ ܐܸܢܹܝܢ ܒܛܘܼܪܹ̈ܐ ܕܝܼܣܪܵܝܹܠ: ܘܲܒ̣ܢܲܚ̈ܠܹܐ ܘܲܒ̣ܟ̣ܠܹܗ ܝܲܬ̣ܒܵܐ ܕܐܲܪܥܵܐ.
[14] ܒܹܝܬ̣ ܪܸܥܝܵܐ ܛܵܒ̣ܵܐ ܐܸܪܥܸܐ ܐܸܢܹܝܢ: ܘܲܒ̣ܛܘܼܪܹ̈ܐ ܪ̈ܵܡܹܐ ܕܝܼܣܪܵܝܹܠ ܢܸܗܘܹܐ ܕܲܝܪܗܹܝܢ: ܬܲܡܵܢ ܢܸܪ̈ܒ̇ܥܵܢ ܒܕܲܝܪܵܐ ܛܵܒ̣ܵܐ: ܘܪܸܥܝܵܐ ܫܲܡܝܼܢܵܐ ܢܸܪ̈ܥܝܵܢ ܒܛܘܼܪܹ̈ܐ ܕܝܼܣܪܵܝܹܠ.
[15] ܐܸܢܵܐ ܪܸܥܝܵܐ ܠܥܵܢ̈ܝ: ܘܐܸܢܵܐ ܐܲܪܒܲܥ ܐܸܢܹܝܢ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.
[16] ܕܐܲܒ̇ܝܼܕܼܵܐ ܐܸܒ̣ܥܸܐ: ܘܲܕܼܛܵܥܝܵܐ ܐܲܗܦܸܟ: ܘܕܲܬ̣ܒ̣ܝܼܪܵܐ ܐܸܥܨܘܿܒ̣: ܘܕܲܟ̣ܪܝܼܗܵܐ ܐܹܚܲܝܸܠ: ܘܲܕܼܫܲܡܝܼܢܵܐ ܘܲܕܼܥܲܫܝܼܢܵܐ ܐܸܛܲܪ: ܘܐܸܪܥܸܐ ܐܸܢܹܝܢ ܒܕܼܝܼܢܵܐ.
[17] ܠܟܹܝܢ ܕܹܝܢ ܥܵܢ̈ܝ: ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܕܵܐܹ̇ܢ ܐ̄ܢܵܐ ܒܹܝܬ̣ ܢܸܩܝܵܐ ܠܢܸܩܝܵܐ ܘܒܹܝܬ̣ ܕܸܟ̣ܪܵܐ ܠܕܸܟ̣ܪܵܐ.
[18] ܠܵܐ ܣܵܦܹ̇ܩ ܠܟ̣ܘܿܢ ܪ̈ܵܥܵܘܵܬ̣ܵܐ: ܪܸܥܝܵܐ ܛܵܒ̣ܵܐ ܕܪܵܥܹ̇ܝܢ ܐ̄ܢܬ̇ܘܿܢ: ܘܫܲܪܟܵܐ ܕܪܸܥܝܼܟ̣ܘܿܢ ܕܵܝܫܝܼܢ ܐ̄ܢܬ̇ܘܿܢ ܒܪܸ̈ܓ̣ܠܲܝܟ̇ܘܿܢ: ܘܡܲـ̈ـܝܵܐ ܫܵܬܹܝܢ ܐ̄ܢܬ̇ܘܿܢ. ܘܫܲܪܟܵܐ ܕܡܵܘܬ̇ܪܝܼܢ ܐ̄ܢܬ̇ܘܿܢ ܕܵܠܚܝܼܢ ܐ̄ܢܬ̇ܘܿܢ ܒܪܸ̈ܓ̣ܠܲܝܟ̇ܘܿܢ.
[19] ܘܥܵܢ̈ܝ ܪ̈ܥܲܝ ܕܵܘܫܵܐ ܕܪܸ̈ܓ̣ܠܲܝܟ̇ܘܿܢ: ܘܐܸܫܬ̇ܝ ܡܲـ̈ـܝܵܐ ܕܕܲܠܲܚ ܪܸ̈ܓ̣ܠܲܝܟ̇ܘܿܢ.
[20] ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܗܵܐ ܕܵܐܹ̇ܢ ܒܹܝܬ̣ ܢܸܩܝܵܐ ܫܲܡܝܼܢܬܵܐ ܠܢܸܩܝܵܐ ܡܚܝܼܠܬܵܐ.
[21] ܥܲܠ ܕܣܵܚ̈ܦܵܢ ܗ̄ܘܲܝ̈ ܒܓܲܒܲܝ̈ܗܹܝܢ ܘܲܒ̣ܟܲܬ̣ܦܵـ̈ـܬ̣ܗܹܝܢ: ܘܲܒ̣ܩܲܪ̈ܢܵܬ̣ܗܹܝܢ ܡܕܲܩܪ̈ܵܢ ܗ̄ܘܲܝ̈ ܠܟ̣ܠܗܹܝܢ ܟܪ̈ܝܼܗܵܬ̣ܵܐ: ܥܕܲܡܵܐ ܕܒܲܕܲܪ ܐܸܢܹܝܢ ܠܒܲܪ.
[22] ܘܐܸܦ̣ܪܩܝܼܗ̇ ܠܥܵܢ̈ܝ: ܘܬ̣ܘܼܒ̣ ܠܵܐ ܬܸܗܘܹܐ ܠܗܘܿܢ ܠܒܸܙܬ̣ܵܐ: ܘܐܸܕ̇ܘܼܢ ܒܹܝܬ̣ ܢܸܩܝܵܐ ܠܢܸܩܝܵܐ: ܘܒܹܝܬ̣ ܕܸܟ̣ܪܵܐ ܠܕܸܟ̣ܪܵܐ.
[23] ܘܐܲܩܝܼܡ ܥܠܲܝܗܹܝܢ ܪܵܥܝܵܐ: ܘܢܸܪܥܹܐ ܐܸܢܹܝܢ: ܕܵܘܝܼܕܼ ܥܲܒ̣ܕ̇ܝ ܗ̤ܘ ܢܸܪܥܹܐ ܐܸܢܹܝܢ: ܘܗ̤ܘ ܢܸܗܘܹܐ ܠܗܹܝܢ ܪܵܥܝܵܐ.
[24] ܘܐܸܢܵܐ ܡܵܪܝܵܐ ܐܸܗܘܹܐ ܠܗܘܿܢ ܐܲܠܵܗܵܐ: ܘܕܼܵܘܝܼܕܼ ܥܲܒ̣ܕ̇ܝ ܢܸܗܘܹܐ ܫܲܠܝܼܛܵܐ ܒܲܝܢܵܬ̣ܗܘܿܢ.
[25] ܘܐܲܩܝܼܡ ܠܗܘܿܢ ܩܝܵܡܵܐ ܕܲܫܠܵܡܵܐ: ܘܐܹܒܲܛܸܠ ܚܲܝ̄ܘܼܬ̣ܵܐ ܒܝܼܫܬܵܐ ܡ̣ܢ ܐܲܪܥܵܐ: ܘܢܸܥܡ̄ܪܘܼܢ ܒܡܲܕܼܒ̇ܪܵܐ ܒܫܸܠܝܵܐ: ܘܢܸܕܼܡ̱ܟ̣ܘܿܢ ܒܥܵܒ̣ܵܐ.
[26] ܘܐܸܬܸ̇ܠ ܠܗܘܿܢ ܒܘܼܪܟܲܬ̣ܝ ܚܕܼܵܪ ܪܵܡܲܬ̣ܝ: ܘܐܲܚܸܬ̣ ܡܸܛܪܵܐ ܒܙܲܒ̣ܢܹܗ: ܘܢܸܗܘܹܐ ܡܸܛܠ ܕܒ̣ܘܼܪܟ̇ܬ̣ܵܐ.
[27] ܘܐܝܼܠܵܢܹ̈ܐ ܕܐܲܪܥܵܐ ܢܸܥܒ̇ܕܼܘܼܢ ܦܹܐܪܹ̈ܐ: ܘܐܲܪܥܵܐ ܬܸܬܸ̇ܠ ܥܲܠ̈ܠܵܬ̣ܵܗ̇: ܘܢܸܬ̇ܒ̣ܘܼܢ ܒܐܲܪܥ̱ܗܘܿܢ ܒܣܲܒ̣ܪܵܐ: ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ: ܡܵܐ ܕܬܸܒ̣̇ܪܹܬ̣ ܢܝܼܪܗܘܿܢ: ܘܦܲܨܝܼܬ̇ ܐܸܢܘܿܢ ܡ̣ܢ ܐܝܼܕܼܵܐ ܕܲܡܫܲܥܒ̇ܕܼܵܢܲܝ̈ܗܘܿܢ.
[28] ܘܬ̣ܘܼܒ̣ ܠܵܐ ܢܸܗܘܘܿܢ ܒܸܙܬ̣ܵܐ ܠܥܲܡܡܹ̈ܐ: ܐܵܦܠܵܐ ܬܹܐܟ̣ܘܿܠ ܐܸܢܘܿܢ ܚܲܝܘܲܬ̣ ܒܲܪܵܐ: ܘܢܸܬ̇ܒ̣ܘܼܢ ܒܣܲܒ̣ܪܵܐ: ܘܠܵܐ ܢܸܗܘܹܐ ܠܗܘܿܢ ܡܲܗܪܵܢܵܐ.
[29] ܘܐܲܩܝܼܡ ܠܗܘܿܢ ܢܸܨܒ̇ܬ̣ܵܐ ܕܲܫܠܵܡܵܐ: ܘܬ̣ܘܼܒ̣ ܠܵܐ ܢܸܫܬܲܢܩܘܼܢ ܒܟܲܦܢܵܐ ܒܐܲܪܥܵܐ: ܘܬ̣ܘܼܒ̣ ܠܵܐ ܢܩܲܒ̇ܠܘܼܢ ܚܸܣܕܵܐ ܕܥܲܡܡܹ̈ܐ.
[30] ܘܢܸܕ̇ܥܘܼܢ ܕܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܗܘܿܢ: ܘܗܸܢܘܿܢ ܐܸܢܘܿܢ ܥܲܡܝ ܕܒܹܝܬ̣ ܝܑܼܣܪܵܝܹܠ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.
[31] ܐܲܢ̄ܬܹ̇ܝܢ ܕܹܝܢ ܥܵܢ̈ܝ ܥܵـ̈ـܢܵܐ ܕܡܲܪܥܝܼܬ̣ܝ: ܒܢܲܝ̈ܢܵܫܵܐ ܐܲܢ̄ܬܹ̇ܝܢ: ܘܐܸܢܵܐ ܐ̄ܢܵܐ ܡܵܪܝܵܐ ܐܲܠܵܗܟܹܝܢ: ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.
|