|
[1]ܘܲܗ̣ܦܲܟ ܐܲܥܠܲܢܝ ܠܬܲܪܥܹܗ ܕܒܲܝܬܵܐ: ܘܲܚܙܹ̇ܝܬ̣ ܡܲـ̈ـܝܵܐ ܕܢܵܦܩܝܼܢ ܡ̣ܢ ܬܚܹܝܬ̣ ܐܸܣܟ̇ܘܼܦܬ̣ܵܐ ܡܲܕܼܢ̱ܚܵܝܬܵܐ ܕܒܲܝܬܵܐ: ܘܗܸܢܘܿܢ ܡܲـ̈ـܝܵܐ ܢܵܚܬܝܼܢ: ܡ̣ܢ ܣܸܛܪܹܗ ܕܒܲܝܬܵܐ: ܡ̣ܢ ܬܲܝܡܢܵܝܹܗ ܕܡܲܕܼܒ̇ܚܵܐ.
[2]ܘܐܲܦܩܲܢܝ ܒܬܲܪܥܵܐ ܓܲܪܒ̇ܝܝܵܐ: ܘܐܲܟ̣ܪ̱ܟܲܢܝ ܡ̣ܢ ܠܒܲܪ ܥܲܠ ܬܲܪܥܵܐ ܕܕܼܵܪܬܵܐ ܕܚܵܐܲܪ ܠܡܲܕܼܢ̱ܚܵܐ: ܘܲܚܙܹ̇ܝܬ̣ ܡܲـ̈ـܝܵܐ ܕܢܵܦܩܝܼܢ ܡ̣ܢ ܣܸܛܪܹܗ ܕܝܲܡܝܼܢܵܐ.
[3]ܘܟܲܕܼ ܢܦܲܩ̣ ܓܲܒ̣ܪܵܐ ܡܫܲܒܲܚ: ܘܲܡܫܘܼܚܬ̣ܵܐ ܒܐܝܼܕܹܗ: ܘܲܡܫܲܚ ܐܵܠܹܦ ܐܲܡܝܼ̈ܢ: ܘܐܲܥ̣ܒ̇ܪܲܢܝ ܒܡܲـ̈ـܝܵܐ ܥܕܲܡܵܐ ܠܩܘܼܪ̈ܨܠܹܐ.
[4]ܘܲܡܫܲܚ ܐܵܠܹܦ ܐܲܡܝܼ̈ܢ: ܘܐܲܥܒ̇ܪܲܢܝ ܒܡܲـ̈ـܝܵܐ ܥܕܲܡܵܐ ܠܒ̣ܘܼܪ̈ܟܹ̇ܐ: ܘܲܡܫܲܚ ܐܵܠܹܦ ܐܲܡܝܼ̈ܢ: ܘܐܲܥܒ̇ܪܲܢܝ ܒܡܲـ̈ـܝܵܐ ܥܕܲܡܵܐ ܠܚܲܨܹ̈ܐ.
[5]ܘܲܡܫܲܚ ܐܵܠܹܦ ܐܲܡܝܼ̈ܢ: ܪܓܸܠܬܵܐ: ܕܠܵܐ ܐ̄ܢܵܫ ܡܸܫܟܲܚ ܠܡܸܥܒ̇ܪܵܗ̇: ܡܸܛܠ ܕܲܣܓ̣ܝܼܘ ܡܲـ̈ـܝܵܐ ܘܥܸܫܢܲܬ̤ ܪܓܸܠܬܵܐ: ܘܠܵܐ ܐ̄ܢܵܫ ܡܸܫܟܲܚ ܠܡܸܥܒ̇ܪܵܗ̇.
[6]ܘܐܸܡܲܪ ܠܝܼ: ܚܵܙܹ̇ܐ ܐܲܢ̄ܬ̇ ܒܲܪܢܵܫܵܐ. ܘܐܵܘܒܠܲܢܝ ܘܐܵܘܬ̇ܒܲܢܝ ܥܲܠ ܣܸܦܬ̣ܵܗ̇ ܕܲܪܓܸܠܬܵܐ.
[7]ܘܟܲܕܼ ܝܸܬ̣ܒܹ̇ܬ̣: ܚܙܹ̇ܝܬ̣ ܥܲܠ ܣܸܦܬ̣ܵܗ̇ ܕܲܪܓܸܠܬܵܐ: ܐܝܼܠܵܢܹ̈ܐ ܕܛܵܒ̣ ܣܲܓ̇ܝܼܐܝܼܢ ܡܸܟܵܐ ܘܡܸܟܵܐ.
[8]ܘܐܸܡܲܪ ܠܝܼ: ܡܲـ̈ـܝܵܐ ܗܵܠܹܝܢ ܕܢܵܦ̇ܩܝܼܢ ܠܲܓܠܝܼܠܵܐ ܕܲܒ̣ܡܲܕܼܢ̱ܚܵܐ: ܘܢܵܚܬ̇ܝܼܢ ܠܓܲܪܒ̇ܝܵܐ: ܘܢܵܦܠܝܼܢ ܒܝܲܡܵܐ ܒܡܲـ̈ـܝܵܐ ܣܪ̈ܲܝܵܐ: ܘܒ̣ܵܣܡܝܼܢ ܡܲـ̈ـܝܵܐ.
[9]ܘܟ̣ܠ ܢܲܦ̮ܫܵܐ ܚܲܝܬ̣ܵܐ ܕܡܵܘܠܕܼܵܐ ܐܵܬܲܪ ܕܐܝܼܬ̣ ܡܲـ̈ـܝܵܐ ܕܲܪܓܸܠܬܵܐ: ܚܵܐܹ̇ܢ ܘܗܵܘܹ̇ܝܢ ܢܘܼܢܹ̈ܐ ܣܲܓ̇ܝܼ̈ܐܹܐ: ܡܸܛܠ ܡܲـ̈ـܝܵܐ ܕܢܵܦܠܝܼܢ ܬܲܡܵܢ ܘܒ̣ܵܣܡܝܼܢ ܡܲـ̈ـܝܵܐ.
[10]ܘܩܵܝܡܝܼܢ ܥܠܵܘܗܝ ܨܲܝ̈ܕܹܐ: ܡ̣ܢ ܥܹܝܢ ܓܵܕܼ ܘܲܥܕܲܡܵܐ ܠܥܹܝܢ ܥܸܓ̣ܠܝܼ̈ܢ: ܡܲܫܛܵܚܹ̈ܐ ܠܲܡܨܝܼ̈ܕܼܵܬ̣ܵܐ ܢܸܗܘܹܐ: ܘܢܸܗܘܘܿܢ ܒܹܗ ܢܘܼܢܹ̈ܐ ܣܲܓ̇ܝܼ̈ܐܹܐ ܐܲܝܟ ܕܝܲܡܵܐ ܪܲܒܵܐ.
[11]ܘܡܲܦܩܵܢܵܘ̈ܗܝ ܘܡܲܥܠܵܢܵܘ̈ܗܝ ܠܵܐ ܢܸܒ̣ܣ̄ܡܘܼܢ: ܐܸܠܵܐ ܢܸܗܘܘܿܢ ܡܸܠܚܵܐ.
[12]ܘܒ̣ܵܗ̇ ܒܲܪܓܸܠܬܵܐ ܢܸܫ̱ܘܚܘܼܢ ܥܲܠ ܣܦܵܪܹ̈ܝܗ̇: ܡܸܟܵܐ ܘܡܸܟܵܐ: ܟܠ ܐܝܼܠܵܢ ܕܡܹܐܟ̣ܘܼܠܬܵܐ: ܠܵܐ ܢܸܬ̇ܪܘܼܢ ܛܲܪ̈ܦܲܝܗܘܿܢ: ܘܠܵܐ ܢܸܓ̣ܡܪܘܼܢ ܦܹܐܪ̈ܲܝܗܘܿܢ: ܘܲܒ̣ܟܠ ܪܹܫ ܝܲܪܚܹܐ ܢܸܗܘܘܿܢ ܡܒܲܟ̇ܪܝܼܢ: ܡܸܛܠ ܕܡܲـ̈ـܝܵܐ ܕܫܵܬܹܝܢ ܡ̣ܢ ܡܲܩܕ̇ܫܵܐ ܢܵܦܩܝܼܢ: ܢܸܗܘܘܿܢ ܦܹܐܪ̈ܲܝܗܘܿܢ ܠܡܹܐܟܲܠ: ܘܛܲܪ̈ܦܲܝܗܘܿܢ ܠܐܵܣܝܘܼܬ̣ܵܐ.
[13]ܗܵܟܲܢܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ: ܢܲܚ̈ܠܹܐ ܕܲܬ̣ܚܘܼܡܹ̈ܐ ܕܝܵܪܬ̇ܝܼܢ ܠܵܗ̇ ܠܐܲܪܥܵܐ: ܠܲܬ̣ܪܸܥܣܲܪ ܫܲܒ̣̈ܛܹܐ ܕܝܼܣܪܵܝܹܠ: ܘܲܕܼܝܵܘܣܸܦ ܠܚܲܒ̣ܠܵܐ.
[14]ܕܬܹܐܪܬ̇ܘܼܢܵܗ̇ ܐ̄ܢܵܫ ܡ̣ܢ ܐܲܚܵܘ̈ܗܝ: ܕܐܲܪܝܼܡܹ̇ܬ̣ ܐܝܼܕܼܝ ܠܡܸܬ̇ܠܵܗ̇ ܠܐܲܒ̣ܵܗܲܝ̈ܟ̇ܘܿܢ: ܘܬܸܬ̣ܦܲܠܲܓ̣ ܠܟ̣ܘܿܢ ܐܲܪܥܵܐ ܠܝܘܼܪܬܵܢܵܐ.
[15]ܘܗܵܢܵܘ ܬܚܘܼܡܵܐ ܕܐܲܪܥܵܐ: ܠܓܲܪܒ̇ܝܵܐ ܡ̣ܢ ܝܲܡܵܐ ܪܲܒܵܐ: ܐܘܼܪܚܵܐ ܕܚܸܬ̣ܪܘܿܢ ܕܥܵܐܠܵܐ ܠܲܨܕܲܕܼ.
[16]ܘܲܚܡܵܬ̣ ܘܒܹܪܘܿܬ̣: ܘܲܣܦܲܪܘܹܝܡ ܕܒܲܝܢܵܬ̣ ܬܚܘܼܡܹ̈ܐ ܕܕܲܪܡܣܘܿܩ: ܘܒܲܝܢܵܬ̣ ܬܚܘܼܡܹ̈ܐ ܕܲܚܡܵܬ̣: ܘܲܚܨܲܪ ܡܸܨܥܵܝܬܵܐ ܕܒܲܬ̣ܚܘܼܡܵܐ ܕܚܵܘܪܵܢ.
[17]ܘܢܸܗܘܸܐ ܬܚܘܼܡܵܐ ܡ̣ܢ ܝܲܡܵܐ ܠܲܚܨܲܪ ܥܲܝܢܵܢ ܕܒܲܬ̣ܚܘܼܡܵܐ ܕܕܲܪܡܣܘܿܩ: ܘܨܸܦܘܿܢ ܕܲܒ̣ܓܲܪܒ̇ܝܵܐ ܕܒܲܬ̣ܚܘܼܡܵܐ ܕܲܚܡܵܬ̣: ܗܵܕܲܐ ܗ̄ܝܼ ܪܘܼܚܵܐ ܕܓܲܪܒ̇ܝܵܐ.
[18]ܘܡ̣ܢ ܪܘܼܚܵܐ ܕܡܲܕܼܢ̱ܚܵܐ: ܡ̣ܢ ܒܹܝܬ̣ ܚܵܘܪܵܢ: ܘܡ̣ܢ ܒܹܝܬ̣ ܕܲܪܡܣܘܿܩ: ܘܡ̣ܢ ܒܹܝܬ̣ ܓܹܠܥܵܕܼ: ܘܡ̣ܢ ܒܹܝܬ̣ ܐܲܪܥܵܐ ܕܝܼܣܪܵܝܹܠ: ܘܝܘܿܪܕ̇ܢܵܢ ܡܬܲܚܸܡ ܥܲܠ ܝܲܡܵܐ ܡܲܕܼܢ̱ܚܵܝܵܐ ܕܬ̣ܵܡܲܪ: ܗܵܕܲܐ ܗ̄ܝܼ ܪܘܼܚܵܐ ܕܡܲܕܼܢ̱ܚܵܐ.
[19]ܘܪܘܼܚܵܐ ܕܬܲܝܡܢܵܐ: ܡ̣ܢ ܬܵܡܵܪ ܘܲܥܕܲܡܵܐ ܠܡܲܝ̈ ܡܪܝܼܒ̣ܬ̣: ܩܲܕ̇ܝܼܫ ܝܘܼܪܬܵܢܹܗ ܕܝܲܡܵܐ ܪܲܒܵܐ.
[20]ܘܲܡܬܲܚܸܡ ܥܕܲܡܵܐ ܠܲܢܟ̣ܵܚ ܕܐܝܼܬ̣ ܒܡܲܥܠܵܢܵܐ ܕܲܚܡܵܬ̣: ܗܵܕܲܐ ܗ̄ܝܼ ܪܘܼܚܵܐ ܕܡܲܥ̱ܪܒ̣ܵܐ.
[21]ܘܲܬ̣ܦܲܠܓ̣ܘܼܢܵܗ̇ ܠܐܲܪܥܵܐ ܗܵܕܹܐ ܠܫܲܪ̈ܒ̣ܵܬ̣ܵܐ ܕܝܼܣܪܵܝܹܠ.
[22]ܘܡܵܐ ܕܦܲܠܸܓ̣ܬ̇ܘܿܢܵܗ̇ ܝܵܪܬ̇ܘܼܬ̣ܵܐ ܠܟ̣ܘܿܢ: ܘܠܲܐܝܠܹܝܢ ܕܡܸܬ̣ܦܢܹܝܢ ܠܘܵܬ̣ ܕܥܵܡ̇ܪܝܼܢ ܒܲܝܢܵܬ̣ܟ̣ܘܿܢ: ܘܐܵܘܠܸܕܼܘ ܒܢܲـ̈ـܝܵܐ ܒܲܝܢܵܬ̣ܟ̣ܘܿܢ: ܢܸܗܘܘܿܢ ܐܲܝܟ ܒܢܲܝ̈ ܝܑܼܣܪܵܝܹܠ: ܘܥܲܡܟ̣ܘܿܢ ܢܦܲܠܓ̣ܘܼܢ ܝܵܪܬ̇ܘܼܬ̣ܵܐ ܒܲܝܢܵܬ̣ ܫܲܪ̈ܒ̣ܵܬ̣ܵܐ: ܕܝܼܣܪܵܝܹܠ.
[23]ܘܫܲܪܒ̇ܬ̣ܵܐ ܕܐܝܼܬ̣ ܒܵܗ̇ ܐܲܝܢܵܐ ܕܡܸܬ̣ܦܢܸܐ ܠܘܵܬܹܝ: ܒܵܗ̇ ܢܸܬ̇ܠܘܼܢ ܠܹܗ ܝܵܪܬ̇ܘܼܬ̣ܵܐ ܐܵܡܲܪ ܡܵܪܹܐ ܡܵܪ̈ܵܘܵܬ̣ܵܐ.
|