|
[1] ܦܬܓܡܐ ܕܗܘܐ ܥܠ ܐܪܡܝܐ ܡܢ ܩܕܡ ܡܪܝܐ: ܡܢ ܒܬܪ ܕܫܕܪܗ ܢܒܘܙܪܕܢ ܪܒ ܕܚܫܐ ܡܢ ܪܡܬܐ: ܟܕ ܕܒܪܗ ܟܕ ܐܣܝܪ ܒܫܫܠܬܐ: ܒܓܘ ܟܠܗ ܫܒܝܬܐ ܕܐܘܪܫܠܡ ܘܕܝܗܘܕܐ ܕܐܫܬܒܝܘ ܠܒܒܠ.
[2] ܘܕܒܪܗ ܪܒ ܕܚܫܐ ܠܐܪܡܝܐ: ܘܐܡܪ ܠܗ: ܡܪܝܐ ܐܠܗܟ݂ ܐܡܪ: ܒܝܫܬܐ ܗܕܐ ܥܠ ܐܬܪܐ ܗܢܐ.
[3] ܘܐܝܬܝ ܘܥܒܕ ܡܪܝܐ ܐܝܟ݂ ܕܐܡܪ: ܥܠ ܕܚܛܝܬܘܢ ܠܡܪܝܐ: ܘܠܐ ܫܡܥܬܘܢ ܒܩܠܗ: ܗܘܐ ܠܟܘܢ ܦܬܓܡܐ ܗܢܐ.
[4] ܠܟ݂ ܕܝܢ ܗܐ ܫܪܝܬܟ݂ ܝܘܡܢܐ ܡܢ ܫܫܠܬܐ ܕܒܐܝܕܝܟ: ܐܢ ܨܒܐ ܐܢ̄ܬ ܠܡܐܬܐ ܥܡܝ ܠܒܒܠ: ܬܐ: ܘܬܗܘܐ ܥܝܢܝ ܥܠܝܟ: ܘܐܢ ܠܐ ܨܒܐ ܐܢ̄ܬ ܠܡܐܬܐ ܥܡܝ ܠܒܒܠ: ܦܘܫ: ܗܐ ܟܠܗ ܐܪܥܐ ܩܕܡܝܟ: ܟܪ ܕܛܒ ܘܟܪ ܕܫܦܝܪ ܒܥܝܢܝܟ ܠܡܐܙܠ: ܠܬܡܢ ܙܠ.
[5] ܘܐܡܪ ܠܗ: ܐܢ ܦܐܫ ܐܢ̄ܬ ܬܒ ܠܘܬ ܓܕܠܝܐ ܒܪ ܐܚܝܩܡ: ܒܪ ܫܦܢ: ܒܓܘ ܥܡܐ: ܗܘ ܕܐܫܠܛܗ ܡܠܟܐ ܕܒܒܠ ܒܩܘܪܝܐ ܕܝܗܘܕܐ: ܐܘ ܟܪ ܕܫܦܝܪ ܒܥܝܢܝܟ ܠܡܐܙܠ: ܙܠ: ܘܝܗ̄ܒ ܠܗ ܢܒܘܙܪܕܢ ܡܘܗܒܬܐ ܒܐܘܪܚܐ: ܘܫܪܝܗܝ.
[6] ܘܐܬܐ ܐܪܡܝܐ ܠܘܬ ܓܕܠܝܐ ܒܪ ܐܚܝܩܡ: ܒܪ ܫܦܢ: ܠܡܨܦܝܐ: ܘܝܬܒ ܠܘܬܗ ܒܓܘ ܥܡܐ ܕܐܫܬܚܪܘ ܒܐܪܥܐ.
[7] ܘܫܡܥܘ ܟܠܗܘܢ ܪܒܝ ܚܝܠܐ ܕܒܩܘܪܝܐ: ܗܢܘܢ ܘܓܒܪܐ ܕܥܡܗܘܢ: ܕܐܫܠܛ ܡܠܟܐ ܕܒܒܠ ܠܓܕܠܝܐ ܒܪ ܐܚܝܩܡ ܒܐܪܥܐ: ܘܕܐܫܠܡ ܠܗ ܓܒܪܐ ܘܢܫܐ ܘܛܠܝܐ: ܘܡܢ ܡܣܟܢܐ ܕܐܪܥܐ ܐܝܠܝܢ ܕܠܐ ܐܫܬܒܝܘ ܠܒܒܠ.
[8] ܘܐܬܘ ܠܘܬ ܓܕܠܝܐ ܠܡܨܦܝܐ: ܐܝܫܡܥܝܠ ܒܪ ܢܬܢܝܐ: ܘܝܘܚܢܢ: ܘܝܘܢܬܢ: ܒܢܝ ܩܘܪܚ: ܘܫܪܝܐ ܒܪ ܬܢܚܡܬ: ܘܒܢܝ ܥܝܦܝ ܕܡܢ ܢܛܘܦܬ: ܘܝܙܢܝܐ ܒܪ ܡܥܟܬ: ܗܢܘܢ ܘܓܒܪܝܗܘܢ.
[9] ܘܝܡܐ ܠܗܘܢ ܓܕܠܝܐ ܒܪ ܐܚܝܩܡ: ܒܪ ܫܦܢ: ܘܠܓܒܪܐ ܕܥܡܗܘܢ: ܘܐܡܪ: ܠܐ ܬܕܚܠܘܢ ܠܡܦܠܚ ܠܟܠܕܝܐ: ܬܒܘ ܒܐܪܥܐ: ܘܦܠܘܚܘ ܠܡܠܟܐ ܕܒܒܠ ܘܢܛܐܒ ܠܟܘܢ.
[10] ܘܐܢܐ ܗܐ ܝܬܒ ܐ̄ܢܐ ܒܡܨܦܝܐ: ܠܡܩܡ ܩܕܡ ܟܠܕܝܐ ܕܐܬܝܢ ܥܠܝܢ: ܘܐܢ̄ܬܘܢ ܚܡܘܠܘ ܥܒܘܪܐ: ܘܚܡܪܐ ܘܡܫܚܐ: ܘܐܒܐ ܕܩܝܛܐ: ܘܐܪܡܘ ܒܡܐܢܝܟܘܢ: ܘܬܒ ܒܩܘܪܝܟܘܢ ܕܐܚܕܬܘܢ.
[11] ܘܐܦ ܟܠܗܘܢ ܝܗܘܕܝܐ ܕܐܝܬ ܒܐܕܘܡ: ܘܒܡܘܐܒ: ܘܒܢܝ ܥܡܘܢ: ܘܒܟܠܗܝܢ ܐܪܥܬܐ: ܫܡܥܘ ܕܫܒܩ ܡܠܟܐ ܕܒܒܠ ܫܪܟܢܐ ܠܝܗܘܕܝܐ: ܘܕܐܫܠܛ ܥܠܝܗܘܢ ܠܓܕܠܝܐ ܒܪ ܐܚܝܩܡ: ܒܪ ܫܦܢ.
[12] ܘܗܦܟܘ ܟܠܗܘܢ ܝܗܘܕܝܐ: ܡܢ ܟܠܗܘܢ ܐܬܪܘܬܐ ܕܐܬܒܕܪܘ ܬܡܢ: ܘܐܬܘ ܠܐܪܥܐ ܕܝܗܘܕܐ ܠܘܬ ܓܕܠܝܐ ܠܡܨܦܝܐ: ܘܚܡܠܘ ܚܡܪܐ ܘܥܠܠܬܐ ܕܩܝܛܐ ܣܘܓܐܐ ܕܛܒ.
[13] ܘܝܘܚܢܢ ܒܪ ܩܘܪܚ ܘܟܠܗܘܢ ܪܒܝ ܚܝܠܐ ܕܒܩܘܪܝܐ: ܐܬܘ ܠܘܬ ܓܕܠܝܐ ܠܡܨܦܝܐ.
[14] ܘܐܡܪܘ ܠܗ: ܠܐ ܝܕܥ ܐܢ̄ܬ ܕܒܠܥܝܣ ܡܠܟܐ ܕܒܢܝ ܥܡܘܢ: ܫܕܪ ܠܐܝܫܡܥܝܠ ܒܪ ܢܬܢܝܐ ܠܡܩܛܠܟ݂: ܘܠܐ ܗܝܡܢ ܐܢܘܢ ܓܕܠܝܐ ܒܪ ܐܚܝܩܡ.
[15] ܘܝܘܚܢܢ ܒܪ ܩܘܪܚ ܐܡܪ ܠܓܕܠܝܐ ܡܛܫܝܐܝܬ ܒܡܨܦܝܐ: ܐܙܠ ܐܩܛܠܝܘܗܝ ܠܐܝܫܡܥܝܠ ܒܪ ܢܬܢܝܐ: ܘܐ̄ܢܫ ܠܐ ܢܕܥ: ܕܠܡܐ ܢܩܛܠܟ݂: ܘܢܬܒܕܪܘܢ ܟܠܗܘܢ ܕܒܝܬ ܝܗܘܕܐ ܕܡܬܟܢܫܝܢ ܠܘܬܟ݂: ܘܢܐܒܕ ܫܪܟܢܐ ܕܝܗܘܕܐ.
[16] ܘܐܡܪ ܓܕܠܝܐ ܒܪ ܐܚܝܩܡ ܠܝܘܚܢܢ ܒܪ ܩܘܪܚ: ܠܐ ܬܥܒܕ ܦܬܓܡܐ ܗܢܐ: ܡܛܠ ܕܕܓܠܘܬܐ ܡܠܠܬ ܥܠ ܐܝܫܡܥܝܠ.
|