|
[1] שיר מזמור לבני־קרח
[2] גדול יהוה ומהלל מאד בעיר אלהינו הר־קדשו
[3] יפה נוף משוש כל־הארץ הר־ציון ירכתי צפון קרית מלך רב
[4] אלהים בארמנותיה נודע למשגב
[5] כי־הנה המלכים נועדו עברו יחדו
[6] המה ראו כן תמהו נבהלו נחפזו
[7] רעדה אחזתם שם חיל כיולדה
[8] ברוח קדים תשבר אניות תרשיש
[9] כאשר שמענו כן ראינו בעיר־יהוה צבאות בעיר אלהינו אלהים יכוננה עד־עולם סלה
[10] דמינו אלהים חסדך בקרב היכלך
[11] כשמך אלהים כן תהלתך על־קצוי־ארץ צדק מלאה ימינך
[12] ישמח הר ציון־תגלנה בנות יהודה למען משפטיך
[13] סבו ציון והקיפוה ספרו מגדליה
[14] שיתו לבכם לחילה־פסגו ארמנותיה למען תספרו לדור אחרון
[15] כי זה אלהים אלהינו־עולם ועד הוא ינהגנו על־מות
|